ખેડૂતના મકાનમાંથી રૂ. ૮.૦૪ લાખના દાગીના અને રોકડની ચોરી
Views: 58
0
0
ખેડૂતના મકાનમાંથી રૂ. ૮.૦૪ લાખના દાગીના અને રોકડની ચોરી
રસોડાની જાળીના સળિયા તોડી ઘરમાં ઘૂસ્યા,લોખંડની તિજોરીને નિશાન બનાવી
સોનાના દોરા ,લોકેટ,વીંટીઓ, ચાંદીના ઘરેણાં અને રોકડ રકમ સહિતનો મુદ્દામાલ તફડાવ્યો
હિંમતનગર(જીગ્નેશ સોની): હિંમતનગર તાલુકાના ગાંભોઈ પોલીસ મથક હદના માથાસુલિયા ગામે તસ્કરોએ એક ખેડૂતના મકાનને નિશાન બનાવી રૂ.૮.૦૪ લાખના મુદ્દામાલની ચોરી કરતાં ગ્રામ્ય વિસ્તારમાં ચકચાર મચી છે. આ અંગે માથાસુલિયા ગામના રહેવાસી અને ખેતીના વ્યવસાય સાથે સંકળાયેલા ૬૩ વર્ષીય જગતસિંહ ભાથીસિંહ પરમારે ગાંભોઈ પોલીસ સ્ટેશનમાં ફરિયાદ નોંધાવી છે.ફરિયાદ અનુસાર તા.૫ જૂનની રાત્રે ૧૧ વાગ્યાથી ૬ જૂનની વહેલી સવારે કોઈ અજાણ્યા તસ્કરોએ તેમના જૂના મકાનના પાછળના ભાગે આવેલા રસોડામાં લગાવેલી લોખંડની જાળીના સળિયા તોડી અંદર પ્રવેશ કર્યો હતો.ત્યારબાદ ઘરમાં રહેલી લોખંડની તિજોરી તોડી તેમાં રાખેલા કિંમતી દાગીના અને રોકડ રકમની ચોરી કરી ફરાર થઈ ગયા હતા.ચોરી થયેલા મુદ્દામાલમાં આશરે ૫૦૦ ગ્રામ વજનની ચાંદીની ઝાઝર કિંમત રૂ.૫૦ હજાર,૨૦૦ ગ્રામ વજનના ચાંદીના છડા કિંમત રૂ.૨૦ હજાર, એક તોલાનું સોનાનું લોકેટ કિંમત રૂ.૧.૧૦ લાખ, બે તોલા વજનના બે સોનાના દોરા કિંમત રૂ. ૨.૨૦ લાખ, આશરે ૬ ગ્રામ વજનની બે સોનાની વીંટીઓ કિંમત રૂ.૬૦ હજારનો સમાવેશ થાય છે.આ ઉપરાંત તેમના નાના પુત્રના લગ્ન પ્રસંગે પુત્રવધૂ ભારતીબાને કરિયાવરમાં મળેલા દાગીનાઓ પણ તસ્કરો ઉઠાવી ગયા હતા. જેમાં ૫૦૦ ગ્રામ ચાંદીના કડલા કિંમત રૂ.૫૦ હજાર,૨૦૦ ગ્રામ ચાંદીના છડા કિંમત રૂ.૨૦ હજાર, એક તોલાનું સોનાનું લોકેટ કિંમત રૂ. ૧.૧૦ લાખ,૬ ગ્રામની બે સોનાની વીંટીઓ કિંમત રૂ.૬૦ હજાર,૮ ગ્રામ વજનની ચાર સોનાની બુટ્ટીઓ કિંમત રૂ. ૮૦ હજાર તેમજ રૂ. ૨૪ હજારની રોકડ રકમનો સમાવેશ થાય છે.
આ રીતે કુલ રૂ. ૮,૦૪,૦૦૦ના મુદ્દામાલની ચોરી થતાં પરિવારજનોમાં ચિંતા અને ગામમાં ભયનો માહોલ જોવા મળ્યો છે. ઘટનાની જાણ થતાં ગાંભોઈ પોલીસ તથા લોકલ ક્રાઈમ બ્રાન્ચ ની ટીમ ઘટના સ્થળે દોડી આવી હતી અને સ્થળ તપાસ હાથ ધરી હતી. પોલીસે તસ્કરોને ઝડપી પાડવા માટે તપાસના ચક્રો ગતિમાન કર્યા છે.
