અમદાવાદમાં ‘સબ સલામત’ ના દાવા પોકળ: અસામાજિક તત્વોનો બેફામ આતંક, વાહનોમાં તોડફોડ અને હિંસક બનાવોથી જનતામાં ફફડાટ
1
0
વટવામાં સગીરને ‘તાલીબાની’ સજા અને નિકોલમાં હથિયારથી હુમલો
અમદાવાદ: ગુજરાતનું આર્થિક પાટનગર ગણાતા અમદાવાદ શહેરમાં પોલીસ પ્રશાસન દ્વારા ગુનાખોરી નિયંત્રણમાં હોવાના મોટા-મોટા દાવા કરવામાં આવે છે. પરંતુ ‘સબ સલામત’ ની ફૂંકાઈ રહેલી આ ગુલબાંગો વચ્ચે વાસ્તવિકતા કંઈક અલગ જ જોવા મળી રહી છે. શહેરમાં છેલ્લા બે દિવસમાં અસામાજિક તત્વોએ મચાવેલા આતંક, વાહનોમાં તોડફોડ અને મારામારીના બનાવોએ પોલીસના પેટ્રોલિંગ અને કાયદો-વ્યવસ્થાની સ્થિતિ પર ગંભીર સવાલો ઉભા કર્યા છે. શહેર કોટડા, વટવા, નિકોલ અને સૈજપુર જેવા વિસ્તારોમાં લુખ્ખા તત્વોના ત્રાસથી સામાન્ય જનતામાં ભારે ભયનો માહોલ જોવા મળી રહ્યો છે.
શહેર કોટડા વિસ્તારમાં આવેલી રચના સ્કૂલ પાસે રાત્રિના સમયે ૨૦થી વધુ વ્યક્તિઓના ટોળાએ અચાનક હુમલો કરી પાર્ક કરેલા ૬થી વધુ વાહનોમાં તોડફોડ કરી હતી. આ ઘટનામાં પોલીસે ૬ શખ્સોની ધરપકડ કરી છે, પરંતુ લોકોની ચિંતા યથાવત છે. આવી જ રીતે સૈજપુરની ગિરીવૃન્દ સોસાયટીમાં અસામાજિક તત્વોએ બેઝબોલના ડંડા વડે વાહનોના કાચ તોડી આતંક મચાવ્યો હતો. રાણીપ વિસ્તારમાં ડી-માર્ટ પાસે પણ રિક્ષામાં તોડફોડ કરી બે લોકોને માર મારવામાં આવ્યો હોવાની ઘટના બની છે. બહેરામપુરામાં તો જાહેર રોડ પર અપશબ્દો બોલી હંગામો મચાવતા શખ્સોનો વીડિયો સોશિયલ મીડિયામાં વાયરલ થયો છે, જેના આધારે પોલીસે શોધખોળ શરૂ કરી છે.
શહેરના નિકોલ વિસ્તારમાં જૂની અદાવત રાખીને એક યુવકને સમાધાનના બહાને બોલાવી તેના પર તીક્ષ્ણ હથિયારોથી ઘાતકી હુમલો કરવામાં આવ્યો હતો, જેના સીસીટીવી ફૂટેજ પણ સામે આવ્યા છે. જોકે, સૌથી ચોંકાવનારો કિસ્સો વટવા વિસ્તારમાં પ્રકાશમાં આવ્યો છે. અહીં એક સગીરને તેના જ મિત્રોએ ઝાડ સાથે બાંધીને નિર્દયતાથી માર માર્યો હતો. આ ‘તાલીબાની’ સજાનો વીડિયો વાયરલ થતા પોલીસ હરકતમાં આવી છે અને જુવેનાઈલ એક્ટ હેઠળ કાર્યવાહી હાથ ધરી છે. વીડિયોમાં સગીર પોતાની જાતને બચાવવા આજીજી કરતો અને બૂમો પાડતો જોવા મળે છે, જે માનવતાને શરમાવે તેવી ઘટના છે.
શહેરમાં વધી રહેલા આવા બનાવોને કારણે નાગરિકો હવે રાત્રિના સમયે બહાર નીકળતા પણ ડરી રહ્યા છે. પોલીસ પેટ્રોલિંગ માત્ર કાગળ પર જ હોય તેમ દેખાઈ રહ્યું છે. અસામાજિક તત્વોને જાણે કાયદાનો કોઈ ડર રહ્યો નથી. લોકો હવે સવાલ કરી રહ્યા છે કે, શું પોલીસ તંત્ર આ લુખ્ખા તત્વો પર લગામ કસવામાં નિષ્ફળ નીવડ્યું છે? જનતાની સુરક્ષા માટે માત્ર દાવા નહીં પણ કડક કાર્યવાહીની જરૂર છે.
