હિંમતનગર ના લાલબહાદુર શાસ્ત્રી માર્કેટની આરસીસી સીડી તોડી નંખાતાં વિવાદ. વેપારીઓએ જિલ્લા કલેકટરને રજુઆત કરી આરસીસી સીડી રાખવા માંગ કરી

રિપોર્ટર:- જીજ્ઞેશ સોની હિંમતનગર

હિંમતનગરના શોપીંગ મોલ પાછળ આવેલ લાલબહાદુર શાસ્ત્રી માર્કેટના દુકાનદારોને ખાસ કરીને ચોમાસામાં ધાબા પર ભરાઈ રહેતા પાણીનો નિકાલ કરવા માટે અગાઉથી જ આરસીસી સીડી બનાવાઈ હતી પરંતુ નગરપાલિકાના કેટલાક પદાધિકારીઓએ અગમ્ય કારણોસર કોઈકને લાભ કરાવી આપવાના આશયથી આ સીડી દુર કરીને વેપારીને ફાયદો કરાવવા માટે કરેલી કાર્યવાહી બાદ તેનો વિરોધ થતાં એક રહીશે તોડી નંખાયેલ આ સીડી ફરીથી બનાવવા માટે જિલ્લા કલેકટરને લેખિત રજુઆત કર્યા બાદ નગરપાલિકાનું તંત્ર હરકતમાં આવ્યું હતું. અને ફરીથી આરસીસી સીડી તૈયાર કરવાની હૈયાધારણ અપાઈ હોવાનું સૂત્રોમાંથી જણાવાયું છે. 

આ અંગે સૂત્રોમાંથી મળતી માહિતી મુજબ લાલબહાદુર શાસ્ત્રી માર્કેટના વેપારીઓની દુકાનો પર જે ધાબુ આવેલ છે ત્યાં અત્યારે વરસાદી પાણી ભરાઈ રહે છે પરંતુ આરસીસી સીડી તોડીને એક દુકાનદારને દુકાન મોટી કરવા માટે માર્ગ મોકળો કરી આપ્યો હતો જે અંગે મોહનલાલ સાંખલાએ તાજેતરમાં જિલ્લા કલેકટરને રજુઆત કરી હતી સાથો સાથ નગરપાલિકાના ચીફ ઓફિસર અને બાંધકામ વિભાગે અગમ્ય કારણોસર આરસીસી સીડી દુર કરવા માટે આડકતરા પ્રયાસ કર્યા હોવાનો આક્ષેપ કરાયો છે. જોકે વેપારીઓના વિરોધ બાદ અગમ્ય કારણોસર વિવાદ વધુ ન વકરે તે આશયથી સાઈડમાં લોખંડની સીડી મુકી દેવામાં આવી છે. પરંતુ વેપારીઓનું કહેવું છે કે જે સ્થળે આરસીસી સીડી હતી ત્યાં ફરીથી સ્થાપીત કરવી જોઈએ. જે અંગે નગરપાલિકાના ચીફ ઓફિસરે પણ આરસીસી સીડી જયાં હતી ત્યાં બનાવવાની હૈયાધારણ આપી છે. ત્યારે નગરપાલિકાના કેટલાક પદાધિકારીઓમાં હાલ તો હડકંપ મચ્યો છે. હવે જોવાનું એ રહે છે કે વેપારીઓએ કરેલો વિરોધ શું પરિણામ લાવે છે તે માટે રાહ જોવી રહી.