સુપ્રીમ કોર્ટે કહ્યું ગમે તેવા મોટા અધિકારી હોય, કોર્ટના આદેશનું પાલન કરવા બંધાયેલા છે, હાઇકોર્ટની ના છતાં પરાણે ઝૂંપડા હટાવ્યા ડે. કલેક્ટરનું પદ ગયું, ૨ માસની કેદ.

ડિમોલિશનના કેસમાં સુપ્રીમ કોર્ટે અધિકારીઓ માટે બોધપાઠ સમાન ચુકાદો આપ્યો હતો. આંધ્ર પ્રદેશના એક અધિકારીએ હાઇકોર્ટે ના પાડી હોવા છતા બળજબરીથી ગરીબોના અનેક ઝૂંપડા હટાવી નાખ્યા હતા અને તેમને રોડ પર લાવી નાખ્યા હતા. સુપ્રીમ કોર્ટે હાઇકોર્ટના આદેશની અવમાનના બદલ આ અધિકારીને ડેપ્યુટી કલેક્ટરના પદેથી હટાવીને સીધા અગાઉના ડેપ્યુટી મામલતદારના પદે પાછા મોકવના એટલે કે ડિમોશન કરવાનો આદેશ કર્યો હતો. સાથે જ એક લાખનો દંડ પણ કર્યો હતો.

સુપ્રીમે ડે.કલેક્ટરનું ડિમોશન કરી ઉપમામલતદારના પદ પર પાછા મોકલ્યા, એક લાખનો દંડ પણ ફટકાર્યો

સુપ્રીમ કોર્ટના ન્યાયાધીશ બી. આર. ગવઇ, ન્યાયાધીશ ઓગસ્ટિન જ્યોર્જની ખેંચે આંધ્ર પ્રદેશ સરકારને આદેશ આપ્યો હતો કે જવાબદાર અધિકારીને ડેપ્યુટી કલેક્ટરના પદેથી પરત ડેપ્યુટી મામલતદારના પદે મોકલવામાં આવે. સાથે જ કહ્યું હતું કે અમે આ ચુકાદા દ્વારા સમગ્ર દેશમાં એક સંદેશો મોકલવા માગીએ છીએ કે કોર્ટના આદેશની અવમાનના કોઈએ પણ ના ચલાવવી જોઈએ.

જ્યારે કોઈ બંધારણીય કોર્ટ મામલામાં જે પણ આદેશ આપે છે ત્યારે ગમે તેટલા ઉંચા પદ પર ઓથોરિટી કેમ ના હોય કોર્ટના આદેશનું સન્માન જાળવવા અને તેનો અમલ કરવા બંધાયેલા છે. આપણી લોકશાહી કાયદાના શાસન પર ટકેલી છે, કોર્ટના આદેશનું પાલન ના કરવું આ કાયદાના શાસનના પાયા પર પ્રહાર સમાન છે.

વર્ષ ૨૦૧૩માં આંધ્ર પ્રદેશ હાઈકોર્ટે ગુંટુર જિલ્લામાં ઝૂંપડાઓ ના હટાવવા માટે તત્કાલીક મામલતદારને આદેશ આપ્યો હતો. આ અપિકારી પાસે હાઈકોર્ટનો આદેશ હોવા છતા તેણે વર્ષ ૨૦૧૪માં ૮૮થી વધુ પોલીસના કાફલો લઈ જઈને અનેક ઝૂંપડા બળજબરીથી હટાવી નાખ્યા હતા. જેની હાઈકોર્ટે ગંભીરતાથી નોંધ લીધી હતી અને આદેશની અવમાનના બદલ અધિકારીને બે મહિનાની કેદની સજા ફટકારી હતી, બાદમાં આ અધિકારી સુપ્રીમ કોર્ટમાં રાહત માટે પહોંચ્યા હતા.

જોકે સુપ્રીમ કોર્ટે ન માત્ર હાઇકોર્ટના સજાના આદેશને યોગ્ય ઠેરવ્યો હતો સાથે સાથે આ અધિકારીને ડેપ્યુટી કલેક્ટરના પદેથી હટાવીને પાછા ડેપ્યુટી મામલતદારના પદ પર મોકલવા આદેશ કર્યો હતો.